Jounen vandredi 31 janvye 2025 lan aprè vwayaj ofisyèl li an Ewòp, nan peyi Itali ak Lafrans, Prezidan Konsèy Prezidansyèl Tranzisyon an, Leslie Voltaire, retounen nan peyi a apre vizit li an Ewòp, prensipalman nan peyi Itali ak Lafrans.
Yon delegasyon ki genyen ladan l Premye minis peyi a Alix Didier Fils-Aimé, Sekretè jeneral Konsèy minis yo Odilien Charles, minis Enteryè ak Kolektivite teritoryal la Paul Antoine Bien-Aimé, minis Jistis ak Sekirite piblik la Patrick Pélissier, Direktè jeneral Polis nasyonal la Normil Rameau ak lòt pèsonalite enpòtan nan sosyete a te akeyi prezidan KPT a sou tamak ayewopò entènasyonal Toussaint Louverture.
Ekselans Leslie Voltaire te adrese l ak laprès pou li te fè bilan vwayaj li ki te kòmanse depi 25 janvye. Nan peyi Itali, li te chita pale ak Pap François sou pwogram tranzisyon an epi yon pwobab konferans entènasyonal sou solidarite ak Ayiti. Li te tou pwofite konfime òganizasyon referandòm nan peyi a nan mwa me 2025 epi eleksyon nan mwa novanm menm ane a. Li te rankontre tou, Sekretè deta Vatikan an ak yon ONG legliz katolik sou kesyon ensekirite ak grangou nan peyi a. Prezidan an te tou pwofite de vizit sila a pou plase yon imaj “Notre Dame du Perpétuel Secours” ki se patwòn Ayiti, nan jaden Vatikan. Nan priyè li te fè, li te tou mande Vyèj la pou ede peyi a jwenn delivrans li anba men gang ak zam yo.
Nan peyi Lafrans, Ekselans Leslie Voltaire te rankontre espesyalman ak Prezidan Emmanuel Macron. Yo te pale sou kesyon ensekirite, èd imanitè ak transfòmasyon fòs miltinasyonal la an misyon pou lapè. Prezidan Lafrans lan te tou pwofite pale de kesyon dèt Endepandans lan, reparasyon ak restitisyon. Li pwomèt pou l pale ankò sou kesyon sa a nan dat 17 avril 2025 lan ki ap make 200 lane depi Wa Charles X te deside fè Ayiti peye pou l ka rekonèt Endepandans li.
Prezidan KPT a te rankontre lòt pèsonalite enpòtan tankou Jean-Luc Mélenchon ak Jean-Marc Ayrault sou kesyon reparasyon ak restitisyon an. Li te chita pale tou ak Sekretè jeneral Òganizasyon Entènasyonal Frankofoni an. Òganizasyon an pwomèt li pral ede peyi a anpil nan kesyon medya sitou nan restriktirasyon Televizyon Nasyonal d Ayiti.
Ekselans Leslie Voltaire te rankontre ak reprezantan Fon Entènasyonal Nasyonzini pou Devlopman Agrikòl yo tou. Li te vizite anbasad Ayiti nan vil Wòm ak Vatikan. Li te dyaloge ak anbasadè Ayiti a epi kominote ayisyèn lan nan peyi Lafrans.
Nan fen entèvansyon li an, li fè konnen vizit li nan peyi Lafrans lan make yon gwo pa nan kesyon dèt Endepandans lan. Li deklare Prezidan Jean-Bertrand Aristide te fè yon pa nan lane 2003, li fenk fè yon lòt epi l konte sou pwochen Prezidan KPT a Fritz Alphonse Jean pou ensiste sou yon lòt pa ankò pou jiskaske Ayiti jwenn sa li bezwen an. Li pa t bliye raple KPT a ap remèt pouvwa a 7 fevriye 2026 bay yon prezidan pèp la ap chwazi nan eleksyon novanm 2025 yo.
Lawouze Info
0 commentaire