Ekonomis Fritz Alphonse Jean tounen ofisyèlman nouvo Prezidan Konsèy Prezidansyèl Tranzisyon an (KPT) a jounen vandredi 7 mas 2025 lan. Li ranplase nan pòs sila a, Mesye Leslie Voltaire epi li ap rete nan tèt Konsèy la jiska 7 dawout 2025 konfòmeman ak rezolisyon 4 oktòb 2024 la konsènan Prezidans tounant lan.
Seremoni pasasyon pouvwa a te òganize nan Viladakèy nan prezans Premye minis Alix Didier Fils-Aimé ak manm Gouvènman li an, Kòmandan an chèf Lame a, Derby Guerrier, Direktè Jeneral Polis la, Rameau Normil, Chèf Misyon miltinasyonal la, Godfrey Otunge ak plizyè manm nan kò diplomatik la.
Nan diskou li fè pou sikonstans lan, Prezidan sòtan an, Ekselans Leslie Voltaire, eksprime fyète l genyen pou pase flanbo a bay Mesye Fritz Alphonse Jean. Li fè konnen Prezidans tounant lan reflete matirite politik manm Konsèy la. Li remèsye kòlèg li yo ak tout lòt moun ki te sipòte l pandan peryòd li t ap prezide KPT a epi li fè bilan reyalizasyon li yo. Li te pwofite di KPT a sou bon chimen nan goumen pou atenn objektif li yo : Sekirite, Refòm konstitisyonèl ak Eleksyon. Li swete nouvo Prezidan Fritz Alphonse Jean bon konba epi fè konnen li ka konte sou tout lòt Konseye-Prezidan yo pou kontinye travay la.
Sou bò pa li, nouvo Prezidan Konsèy la, Ekselans Fritz Alphonse Jean pwomèt pou l kontinye travay pou KPT a akonpli misyon li. Li salye epi rekonèt efò predesesè li fè pou ede peyi a vanse.
Kowodonatè Konsèy la raple enpòtans linite nan lagè Leta a ap fè kont ensekirite. Li pwomèt li pral mobilize tout resous nan Leta a pou goumen pou mete lapè nan peyi a. Nan sans sa a, gen anviwon 3 000 rekritman ki pral fèt nan Lame ak Polis la. Gen plizyè lòt gwo mezi KPT a pral pran toujou nan sousi pou rezoud pi gwo pwoblèm peyi a ap fè fas la. Konsèy Prezidansyèl Tranzisyon an ap fè tout sa l kapab pou l toujou pi pwòch popilasyon an pou asire byennèt li.
Lawouze Info
0 commentaire