Prezidan Konsèy Prezidansyèl Tranzisyon an (KPT), Ekselans Fritz Alphonse Jean adrese l ak nasyon an, jounen jedi 3 avril 2025 lan. Konseye-Prezidan Leslie Voltaire, Edgard Leblanc Fils, Louis Gérald Gilles, Smith Augustin, Emmanuel Vertilaire, Régine Abraham, Premye minis Alix Didier Fils-Aimé, Sekretè jeneral Palè nasyonal la, Marie Élisabeth Régine Joseph Haddad, Responsab Misyon miltinasyonal la, Jeneral Godfrey Otunge, Direktè jeneral Polis la, Rameau Normil, Kòmandan an chèf Lame a, Derby Guerrier, te akonpaye l nan entèvansyon sila a.
Prezidan KPT a di li tande kri ak soufrans popilasyon an. Li raple jounen sa a make premye anivèse akò 3 avril 2024 la. Konsèy la kanpe bò kote pèp la pou derasinen pwoblèm k ap ravaje popilasyon an. Kowòdonatè KPT a fè konnen lè a rive pou lapè tabli nan peyi a tout bon vre paske tan an grav anpil.
Nan sans sa a, Konsèy la gentan pran plizyè gwo mezi pou ranfòse batay la kont gang yo. Li pase gouvènman an lòd pou idantifye ajan BSAP ki ranpli tout kritè yo, pou asosye yo ak Lame epi Lapolis pou kapab mennen lagè a. Li mande pou tout gouvènman an ak tout sitwayen, enplike nan jan pa yo, nan gwo goumen k ap mennen pou libere peyi a. Pou ranfòse batay la, gouvènman an pral ratifye yon nouvo bidjè ki ap priyorize kesyon lagè kont bandi yo.
Konsèy Prezidansyèl Tranzisyon an renouvle angajman l pou l chanje mòd fonksyonman Leta a, mete fen ak fenomèn ensekirite a pou pèmèt machin elektoral la kontinye mache, pou l ka remèt peyi a, nan dat 7 fevriye 2026, bay otorite ki ap soti nan eleksyon. Batay la pa fasil, men KPT a motive pou goumen jouk mayi mi pou delivre peyi a.
Lawouze Info
0 commentaire